Fjella i Sykkylven er ein del av dei vidgjetne Sunnmørsalpane og eit eldorado for dei som likar fjellturar. Måla er mange. Dei fleste fjelltoppane i Sykkylven ligg mellom 1000 og 1600 m.o.h., og bygda har fleire av dei vakraste overgangsturane ein kan få på Sunnmøre. Velleseterdalen-Gullmordalen-Urke, eller Velleseterdalen-Gullmordalen-Gullmorbreen-Patchellhytta-Habostaddalen er begge turar som garantert vil gi minnerike opplevingar. Det same gjeld turen gjennom Riksheimdalen og over til Trandal i Hjørundfjorden. Ein mieir farmilievennleg overgangstur er Hundeidvik- Megardsdalen-Riksheimdalen-Erstad.

Guiding

For den som ikkje er kjend med å gå i fjellet , eller for personar eller grupper som ynskjer å oppleve noko utanom det vanlige , så er det tilbod om organisert guiding i fjellheimen. "Sunnmørsalpane guiding og naturopplevelser" tilbyr turar i fjellet på ulike nivå. Frå vandring til "lett" klivring , blåturar/trivselsturar for firma eller ulike grupper , lett brevandring , kanoturar og overnattingsturar i lavvu.

Tindeklatring

Dei høgaste tindane er utfordrande mål for dei litt meir dristige av oss. Dei mest alpine fellformasjonane finn vi på Rånahalvøya, fjellpartiet mellom Sykkylvsfjorden/Velledalen og Hjørundfjorden. Her finst det både familievennlege toppar og tindar der røynde fjellklatrarar kan finne seg ei utfordring. Brevandring Sykkylven kan også tilby brevandring. Både Regndalsbreen og Gullmorbreen (forøvrig den største isbreen på Sunnmøre) er midt i blinken. Dersom ein ynskjer å ta seg fram på breane er det viktig å ha med seg kjentfolk og følge tryggleiksreglane som gjeld for brevandring.

Overnatting

Turisthytte eller telt er alternativar for dei som ynskjer å overnatte i fjellheimen. Velleseterhytta er ei av dei ubetjente hyttene til Ålesund og Sunnmøre Turistforening. Hytta ligg i Velleseterdalen, og er omkransa av brear og kvasse tinderekkjer. Velleseterhytta er eit framifrå utgangspunkt for fleire turar i Sunnmørsalpane. Patchellhytta , som høyrer til Stranda kommune, er også ei fin hytte å overnatte i.

Turbeskrivelsar

Dei aller fleste fjellturane er presenterte på denne sida. Kartet er interaktivt slik at du kan velge turbeskrivelsar berre ved å klikke på fjellet du ynskjer å vite noko om. 45 turar er lagt ut hittil. Resten av toppane vil verte lagt ut etter kvart.